hugveitan

Mig langar að benda fólki sem hefur áhuga á lýðræðishugtakinu á að kynna sér Hugveituna. Hún er hugarsmíð Guðmundar Ágústs Sæmundssonar, samnemanda úr HHS náminu á Bifröst, en eins og segir á heimasíðu hans:

“Hugveitan er ýtarlega unnin hugmynd að vefhugbúnaði sem bætt getur lýðræðið á Íslandi til mikilla muna.  Hugmyndin varð til í kringum árið 2001 en hefur tekið miklum breytingum síðan þá. Hún er ekki orðin að veruleika ennþá, en með aðstoð áhugasamra getur hún orðið það innan tíðar.”

Allar nánari upplýsingar um hugmyndina er að sjá á heimasíðu Guðmundar sem ég vísa í hér að framan svo ég sleppi allri frekari kynningu eða málalengingum um hana hér.

Snilldarhugmynd á réttum tíma sem ég hvet alla til að skoða með opnum huga.

Tími tækifærana

Langt síðan ég hef skrifað hér. Þörfin fyrir útrás er eitthvað að minnka. Ég lít á það sem batamerki. Undanfarið hefur mig þó oft langað að tjá mig, um málefni líðandi stunda, enda allt að verða kolklikk í þjóðfélaginu. Ég er bara orðin svo værukær og löt að ég nenni ekki að tjá mig.

Þjóðfélagsumræðan snýst um bankagjaldþrot, auðmenn þessa lands (leitt að geta ekki sagt fyrrverandi auðmenn, en well…) hafa sett þjóðina í þrot. Margir hafa tapað. Sumir miklu, aðrir öllu og einhverjir meira en öllu. Það eru þeir sem tóku lán til að kaupa hlutabréf til dæmis. Einhvern slatta af hlutabréfum sennilega. Allir töpuðu þeir á því. Nema sumir. Ekki vildi ég vera sumir.

Ég er bara meðal einhver og held að ég komi bara nokkuð normalt út úr þessari kreppu. Sem er reyndar bara rétt að byrja.

Það er ljótt að segja að kannski hafi verið komin tími á einhvers konar hreinsun en ég held að jafnvel hafi svo verið. Frekar laim samt að það skyldu vera þeir sem best fara út úr kreppunni sem voru valdir af henni. En það þýðir ekkert að spá í það.

Ég lít á þessa stöðu sem stöðu tækifærana. Nú þarf hver og einn að koma sér áfram á eigin verðleikum. Tækifærin liggja alls staðar. Það þarf bara að koma auga á þau og grípa þau svo þau fljúgi ekki framhjá.

Það eru spennandi tímar framundan.

Frændsystkin

Við mæðgur erum búnar að vera hjá Mæju Pæju síðan í gærkvöldi. Þessi skemmtilega mynd var tekin af börnunum okkar núna áðan þar sem þau voru búin að koma sér þægilega fyrir í rúmi elstu heimasætunar að horfa á mynd í sjónvarpinu.

Hjólastelpur

Við mæðgur fórum í dag og versluðum nýtt hjól fyrir átta ára skvísuna sem átti eftir að fá afmælisgjöfina sína frá því í júlí. Við fórum nebbla í hjólatúr um hverfið í gær og þá kom í ljós, það sem reyndar vitað var, að gamla sjöþúsundkrónahjólið var bilað/ónýtt. Þar sem við erum um það bil að hefja glænýjan lífstíl þá var ekki um neitt annað að ræða en að fjárfesta í almennilegu hjóli handa gellunni.

Á heimleiðinni komum við við hjá Heiðari litla bró og horfðum á Dagvaktina frá því síðustu helgi og fórum svo heim og þrifum sameignina. Þegar því var lokið fórum við í fínan hjólatúr um hverfið. Magnað alveg hreint.

Karl

Við mæðgur erum komnar með Karl á heimilið.

Ekki leiðinlegt. Nema honum fylgir sóðaskapur.

Við kjósum að kalla það fórnarkostnað.

Önnur okkar er mun glaðari með Kalla en hin. Þið megið geta hvor…

BA í HHS

Í dag skrapp ég á Bifröst ásamt mömmu og Mæju sys.

Núna er ég með BA gráðu í heimspeki, hagfræði og stjórnmálafræði.

Þokkalega sátt. Skál í boðinu!

Maraþon

Við mæðgur vorum að koma úr 3. km. “maraþoni” Glitnis. Allar bættum við okkur stórkostlega, enda aldrei tekið þátt áður.

Þakklát

Hef ég nefnt það hvað ég er óendanlega þakklát?

Þakklát fyrir að eiga dásamleg og heilbrigð börn.

Þakklát fyrir að eiga dásamlega fjölskyldu.

Þakklát fyrir að eiga yndislega vini.

Þakklát fyrir hvað röð “tilviljana” (ef þær yfirhöfuð eru til) gera líf mitt auðugra.

Þakklát fyrir allt það góða fólk sem á vegi mínum hefur verið í gegnum lífsleiðina.

Þakklát fyrir að hafa kynnst slæmu hliðum fólks sem stóð mér nærri. Það hefur ekki síst kennt mér sitthvað. Margur verður af aurum api og þannig apar eru aumkunnarverðir.

Þakklát fyrir að það fólk sem fyrir mér hefur átt að liggja að kynnast betur gafst ekki upp á mér þó svo ég sé seintekin.

Þakklát fyrir allt sem lífið hefur gefið mér, sem er ekkert smáræði!

Annáll sumarsins

Það hefur ekki farið mikið fyrir fréttum af mér í sumar, enda ég búin að vera verulega bissí að njóta lífsins í dásamlegu veðri. Í stuttu máli er sumarið búið að vera svona:

Stelpurnar voru hjá mér í 5 vikur og fóru eftir það norður og voru þar í aðrar 5 vikur. Í júní byrjaði ég að skrifa BA ritgerðina mína sem ég svo skilaði í gær. Er búin að hafa góðan tíma til að skrifa hana enda var það alltaf planið. Skrifa og njóta sumarsins. Tók mér frí frá skrifum flestar helgar. Stóra stelpan var í vinnu hérna við skólann í júní og líkaði mjög vel og sérlega vel eftir að hún fékk útborgað. Síðustu vikuna sem þær voru hjá mér fyrir sumarfrí hjá þeim fórum við á landsmót hestamanna á Hellu.

Það er nú varla hægt að segja að tjaldvagninn hafi verið neitt sérstaklega ofnýttur í sumar en auk viku útilegu á Hellu fór ég með Ellu og Davíð á Mærudaga á Húsavík. Það var verulega skemmtileg ferðalag svo ekki sé sterkar kveðið að orði og nauðsynlegur partur af batteríhleðslunni fyrir lokatörnina í ritgerðarskrifunum.

Síðustu tvær vikur hef ég svo setið nótt og dag og skrifað. Hugsa að meðal svefntími á sólarhring hafi ekki farið uppfyrir 5 tíma. Oft 2-3 tímar. Þrátt fyrir svefnleysi, sem ég efast ekki um að ég komi til með að vinna upp fljótlega, voru þessar tvær síðustu vikur sérstaklega skemmtilegar og að ég nú ekki tali um lærdómsríkar.

Núna þegar ég hef skilað af mér lokaverkefninu í BA náminu er komið að breytingum hjá okkur litlu fjölskyldunni. Við erum að flytja frá Bifröst eftir hálfan mánuð eftir að hafa búið hér og lifað í bómulinni okkar í tæp tvö ár. Því fylgir mikill tregi og söknuður því hér hefur okkur liðið alveg einstaklega vel. Við erum komin með íbúð á stúdentagörðum í Rvk sem við fáum afhenta eftir sléttar tvær vikur. Sóley skvísa er að fara í 3. bekk og kemur til með að ganga í Melaskóla. Hún hlakkar heilmikið til að takast á við nýtt umhverfi og nýjar aðstæður, bjarsýn og brosandi eins og alltaf. Eins hyggst einkasonurinn flytja til okkar í bæinn og leitar nú að málarameistara sem vantar hörkuduglegan og samviskusaman strák á samning. Stóra stelpan er að fara að klára grunnskólann fyrir norðan í vetur og sjálf er ég að hefja MPA nám í HÍ í haust.

Það eru sem sé góðir tímar framundan og engin ástæða til annars en hlakka til framtíðarinnar.

Já

Kannski maður fari að nota þetta pláss til að tjá sig fljótlega.